Pólska stjórnarandstaðan mælist stærri en stjórnarflokkarnir

Ný skoðanakönnun í Póllandi sýnir að tveir helstu stjórnarandstöðuflokkarnir njóta nú meiri stuðnings en samsteypustjórn þjóðernisíhaldsmanna. Mótmælalda hefur gengið yfir landið að undanförnum vegna tilrauna stjórnarinnar til að endurskipuleggja réttarkerfið.

Dagblaðið Rzeczpospolita birti könnun sem sýnir að frjálslyndu flokkarnir tveir, Borgaralega stefnan og Nowoczesna fengju 35% atkvæða ef kosið yrði í dag. Þriggja flokka samsteypustjórnin undir forystu Laga og réttlætis fengi hins vegar 32%.

Ríkisfréttastofan TVP Info, sem hefur verið gagnrýnd fyrir vinnubrögð sín, birti aftur á móti aðra könnun sem sýndi stjórnarflokkana með 38% gegn 34% stjórnarandstöðuflokkanna ef þeir byðu sig allir fram hver í sínu lagi. Ekki var greint frá því hvað bandalag stjórnarandstöðuflokkanna fengi, að því er segir í frétt Reuters-fréttastofunnar.

Andrzej Duda, forseti, beitti neitunarvaldi til þess að koma í veg fyrir að tvö frumvörp sem hefðu meðal annars gert ríkisstjórninni kleift að skipta út öllum hæstaréttardómurum landsins yrði að lögum á mánudag.

Breytingum ríkisstjórnarinnar á dómskerfinu hefur verið mótmælt víða um Pólland undanfarið og hafa fulltrúar Evrópusambandsins hótað því að beita pólsk stjórnvöld refsiaðgerðum verði breytingarnar að lögum.