Í höndum dómara hvort foreldrar Charlie Gard fá að fara með hann heim

Foreldrar langveika drengsins Charlie Gard berjast nú fyrir því að fá að hafa hann heima síðustu dagana áður en slökkt verður á öndunarvél hans. Breskur dómari mun úrskurða um kröfur þeirra í dag.

Charlie er ellefu mánaða gamall og þjáist af sjaldgæfum og banvænum sjúkdómi. Barátta foreldra hans til að fá að fara með hann til Bandaríkjana í umdeild meðferð hefur vakið heimsathygli.

Connie og Chris Gard, foreldrar Charlie, hafa gefist upp á þeirri baráttu en vilja nú fara með hann heim og eyða nokkrum dögum með honum þar áður en hann verður tekinn úr öndunarvélinni sem hefur haldið í honum lífinu.

Læknar hans hafa sagt að það sé ómögulegt að færa allan nauðsynlegan búnað heim til foreldra hans. Þá gætu sérfræðilæknar ekki annast hann á heimilinu. Lögmenn Gard-fjölskyldunnar saka Great Ormond Street-sjúkrahúsið um að leggja steina í götu hennar í sífellu.

Dómari hefur gefið foreldrunum frest þangað til í dag til að finna sérfræðinga sem eru tilbúnir að annast Charlie heima hjá þeim, að því er segir í frétt Reuters-fréttastofunnar. Takist þeim það ekki er líkleg niðurstaða að Charlie verði fluttur á líknardeild.