Telja að innflutningur á ferskum búvörum hingað til lands hafi ekki slæm áhrif á heilsu manna og dýra

Niðurstöður skýrslu sem ráðgjafarfyrirtækið Food Control Consultants vann fyrir Félag atvinnurekenda (FA) leiða í ljós að ekki séu haldbær rök fyrir því að innflutningur á vörum úr ógerilsneyddri mjólk, ferskum eggjum og fersku kjöti muni hafa slæm áhrif á heilsu manna og dýra.

Þá segir í skýrslunni að svo virðist sem að ekki sé heldur hægt að fullyrða að innflutningur á þessum vörum muni hafa áhrif á útbreiðslu lyfþolinna baktería.

Eins og er ríkir bann við innflutningi á fersku kjöti, ferskum eggjum og vörum úr ógerilsneyddri mjólk á Íslandi. Að því er fram kemur í tilkynningu FA vegna skýrslu Food Control Consultants brjóta þessi bönn gegn EES-samningnum að mati Eftirlitsstofnunar EFTA og byggja ekki á vísindalegum rökum.

Skoðuðu sérstaklega stöðuna í Noregi

„EFTA-dómstóllinn og Héraðsdómur Reykjavíkur hafa komist að þeirri niðurstöðu að bann við innflutningi á fersku kjöti fari í bága við EES-samninginn. Mál ESA gegn íslenska ríkinu vegna innflutningsbanns á kjöti annars vegar og eggjum og mjólkurvörum úr ógerilsneyddri mjólk hins vegar hafa verið sameinuð hjá EFTA-dómstólnum. Málflutningur verður í haust og má vænta dóms öðru hvoru megin við áramót. Niðurstöðu Hæstaréttar í máli Ferskra kjötvara gegn íslenska ríkinu vegna banns við innflutningi á fersku kjöti má vænta á svipuðum tíma.

Höfundar skýrslunnar skoðuðu sérstaklega stöðuna í Noregi, en þar hefur ferskt kjöt, egg og mjólkurvörur úr ógerilsneyddri mjólk verið flutt inn um árabil í samræmi við reglur EES. Niðurstaðan er að frjálst flæði þessara vara hafi hvorki haft áhrif á lýðheilsu né dýraheilbrigði í Noregi,“ segir í tilkynningu FA.

Huga þarf sérstaklega að frárennslismálum til að fyrirbyggja sýklalyfjaóþol

Þá benda höfundar skýrslunnar á að ástæða sé til að huga vel að frárennslismálum svo að fyrirbyggja megi sýklalyfjaóþol hjá fólki en í umræðum um innflutning á kjöti hefur verið rætt um að önnur ríki EES noti meira af sýklalyfjum í landbúnaði en Ísland.

Innflutningur á landbúnaðarvörum geti því aukið þol gegn sýklalyfjum hjá fólki en skýrsluhöfundar, þeir Ólafur Oddgeirsson og Ólafur Valsson, vísa til nýlegra rannsókna í Hollandi og Danmörku en þær benda til þess að lítið samhengi sé á milli lyfjaþolinna baktería í fólki og þeirra sem finnast í matvælum.

„Höfundar benda á að ástæða sé til að huga vel að frárennslismálum til að fyrirbyggja sýklalyfjaóþol hjá fólki. Skólp og frárennsli séu einn helsti skaðvaldurinn hvað varðar bakteríumengun í umhverfinu, en í ljós hafi komið að frárennslismál séu víða í ólestri á Íslandi. Enn ríkari ástæða sé til að huga vel að frárennslismálum þar sem gífurleg aukning hafi orðið í fjölda fólks á landinu vegna ferðamannastraums,“ segir í tilkynningu FA.

Skýrsluna má kynnast sér nánar hér.