Ancelotti bannað að reykja hjá Bayern

Eitt fyrsta verk Hasans Salihamidzic, nýs íþróttastjóra Bayern München, var að banna Carlo Ancelotti, knattspyrnustjóra þýsku meistarana, að reykja á félagssvæðinu.

Salihamidzic var ráðinn til Bayern fyrir um þremur vikum síðan og er strax byrjaður að láta til sín taka. Bosníumaðurinn er öllum hnútum kunnugur hjá Bayern en hann lék með liðinu á árunum 1998-2007.

„Ég bað Ancelotti um að reykja ekki hér. Að sjálfsögðu samþykkti hann það enda sannur fagmaður,“ sagði Salihamidzic við Sky.

Ancelotti segist ekkert vera ósáttur við þessa breytingu.

„Þetta er gott fyrir heilsuna. Konan mín er hæstánægð,“ sagði Ítalinn sem er að hefja sitt annað tímabil við stjórnvölinn hjá Bayern.