Umhverfisstofnunin fer yfir „pólitíska“ loftslagsskýrslu

Starfsmenn bandarísku Umhverfisstofnunarinnar (EPA) munu fara yfir sannleiksgildi nýrrar loftslagsskýrslu sem vísindamenn þrettán alríkisstofnana hafa tekið saman, að sögn forstjóra stofnunarinnar.

Scott Pruitt, forstjóri EPA, er kunnur afneitari loftslagsvísinda og sagði meðal annars eftir að hann tók við stöðunni að hann tryði því ekki að koltvísýringur væri aðalorsakavaldur hnattrænnar hlýnunar, þvert á vísindalega þekkingu þess efnis.

Í vikunni fjallaði New York Times um drög að stórri loftslagsskýrslu sem vísindamenn alríkisstofnana vinna á fjögurra ára fresti að beiðni Bandaríkjaþings. Fátt nýtt kom fram í skýrslunni en þar voru dregnar saman orsakir og afleiðingar loftslagsbreytinga í Bandaríkjunum og hvernig þær eru þegar byrjaðar að hafa áhrif á líf landsmanna.

Þó að skýrslan hafi verið vistuð á netinu eftir að hún var gerð opinber tímabundið fyrr á árinu þegar hún var í umsagnarferli töldu vísindamenn sig leka henni til blaðsins af ótta við að ríkisstjórn Donalds Trump myndi sitja á henni. 

Sjá einnig:Loftslagsskýrslu lekið af ótta við að hún verði þögguð niður

Ekkert hefur komið fram um að skýrslan verði þögguð niður en vísindamenn eru sagðir uggandi um það vegna andstöðu ríkisstjórnarinnar við loftslagsaðgerðir og höfnun á loftslagsvísindum. Trump ætlar meðal annars að draga Bandaríkin út úr Parísarsamkomulaginu.

Vill ekki að vísindi hafi áhrif á stefnumótun stjórnvalda

Nú segir Pruitt að starfsmenn EPA muni fara yfir hvort að skýrslan sé nákvæm, jafnvel þó að stofnunin hafi þegar átt aðkomu að gerð skýrslunnar.

„Þessi skýrsla ætti hreinlega að fara í gegnum ritrýni, hlutlæga skoðun á aðferðafræði og mat,“ sagði Pruitt í útvarpsþætti í Texas á fimmtudag, að sögn Politico.

„Það ætti ekki að blanda pólitík í vísindi. Vísindi er ekki eitthvað sem menn ættu bara að grípa í til að hafa áhrif á stefnumótun í Washington-borg,“ sagði hann ennfremur.

Vísindamenn frá virtum stofnunum eins og geimvísindastofnuninni NASA og Haf- og loftslagsstofnuninni NOAA eru á meðal aðalhöfunda loftslagsskýrslunnar.

Áratugir rannsókna sem hafa verið ritrýndar ítarlega

Þrátt fyrir orð Pruitt byggist skýrslan á niðurstöðum rannsókna vísindamanna sem hafa verið ritrýndar. Fjórtán manna nefnd hjá Bandarísku vísindaakademíunni hefur þegar farið yfir innihald skýrslunnar og lagt blessun sína yfir hana.

Vísindamenn sem Politico ræddi við vegna ummæli Pruitt voru klumsa og sögðust ekki vita á hverju þeir mættu eiga von frá honum.

„Þetta er miklu viðameira ferli en hefðbundin ritrýni en hún kemur venjulega ekki út sem kilja,“ segir Bob Kopp, aðalhöfundur skýrslunnar og loftslagsvísindamaður við Rutgers-háskóla.

Eric Davidson, forseti Bandaríska jarðfræðisambandsins, segir að skýrslan hafi farið í gegnum stífa ritrýni og hún byggist á birtum vísindarannsóknum frá hálfrar aldar tímabili sem fóru hver og ein í gegnum ritrýni.

„Spurning er hvort að það verði fólk sem eru sérfræðingar í vísindum sem fara yfir skýrsluna eða verður það fólk sem er með pólitískt markmið?“ segir Kathy Jacobs sem hafði umsjón með loftslagsmatsverkefninu sem skýrslan er hluti af í tíð Baracks Obama fyrrverandi forseta.

Alríkisstofnanirnar þrettán sem leggja nafn sitt við skýrsluna hafa fram til 18. ágúst til þess að skrifa upp á hana.