Sveinn Gestur ekki ákærður fyrir manndráp

Héraðssaksóknari hefur ákært Svein Gest Tryggvason fyrir stórfellda líkamsárás. Sveinn Gestur var leiddur fyrir dómara í Héraðsdómi Reykjavíkur í dag þar sem gæsluvarðhald yfir honum var framlengt til 28. september. Þetta staðfestir verjandi hans, Þorgils Þorgilsson, við Vísi. 

Sveinn Gestur hefur verið í gæsluvarðhaldi undanfarnar tólf vikur grunaður um að hafa ráðið Arnari Jónssyni Aspar bana þann 7. júní síðastliðinn. Hann er einn ákærður í málinu en upphaflega voru sex handteknir. Þá var Jón Trausti Lúthersson í gæsluvarðhaldi í fjórar vikur en ekki þykir ástæða til að ákæra hann fyrir aðild að málinu.

Málið var rannsakað sem manndrápsmál og hefur komið fram í gæsluvarðhaldsúrskurðum að brot gests hafi varðað 211. grein almennra hegningarlaga sem fjallar um manndráp.

Héraðssaksóknari ákveður hins vegar að ákæra Svein Gest fyrir brot á 218. grein laganna sem fjallar um stórfellda líkamsárás. Brotið getur varðað allt að sextán ára fangelsi þegar bani hlýst af árásinni.

Matarboð í Mosfellsdal

Sérsveit ríkislögreglustjóra, ásamt lögreglu, slökkviliði og sjúkraflutningamönnum var kölluð að Æsustöðum í Mosfellsdal, að kvöldi 7. júní vegna alvarlegrar líkamsárásar sem leiddi Arnar Jónsson Aspar til dauða.

Matarboð stóð yfir á heimili Arnars umrætt kvöld og unnustu hans þegar sex manns bar að garði. Þar voru auk þeirra tveggja tíu daga gömul dóttir þeirra og hjartveikur afi unnustunnar sem flytja þurfti á sjúkrahús seinna um kvöldið, í áfalli eftir það sem gerst hafði.

Fimm karlmenn og ein kona voru handtekinn skömmu eftir árásina, þar með talið Sveinn Gestur og Jón Trausti. Farið var fram á gæsluvarðhald yfir einstaklingunum sex en fljótlega var öllum sleppt úr haldi nema Sveini Gesti og Jón Trausta.

Heldur því fram að hinn látni hafi verið í „sturlunarástandi“

Eins og áður segir er Sveinn Gestur einn ákærður fyrir líkamsárásina. Í gæsluvarðhaldsúrskurði Héraðsdóms Reykjavíkur kemur fram að andlát Arnars sé rakið til nokkurra samverkandi þátta en „en þvinguð frambeygð staða sem brotaþola hafi verið haldið í, með hendur fyrir aftan bak, meðan kærði hafi þrýst með líkama sínum á brjósthol brotaþola og hálstakið sem kærði hafi haldið brotaþola í, samkvæmt framburði vitna, sé talið hafa leitt til mikillar minnkunar á öndunargetu sem að lokum hafi leitt til köfnunar brotaþola.“

Þá hefur komið fram að samkvæmt krufningskýrslu réttarmeinafræðings sé einnig talið að svokallað æsingsóráðsheilkenni hafi dregið Arnar til dauða, en um afar sjaldgæft heilkenni er að ræða.

Heilkennið kemur almennt fram við handtökur en það var talsvert til umfjöllunar árið 2007 þegar Jón Helgason lést í kjölfar handtöku árinu áður.

Sveinn Gestur neitar alfarið sök og í yfirlýsingu frá lögmanni hann sem send var fjölmiðlum fyrr í mánuðinum var því haldið fram að Sveinn Gestur hafi aldrei veist að hinum látna „heldur var umbjóðandi minn ásamt öðrum sakborningum í málinu að verjast áras frá hinum látna.“