Hættir með landslið Kósóvó eftir leikinn gegn Íslandi

Leikur Íslands gegn Kósóvó þann 9. október næstkomandi verður síðasti leikur Albert Bunjaki sem þjálfari landsliðs Kósóvó en forseti knattspyrnusambands Kósóvó staðfesti þetta á dögunum.

Kósóvó er í riðli með íslenska liðinu í undankeppninni fyrir Heimsmeistaramótið í Rússlandi 2018 en þetta er í fyrsta skiptið sem Kósóvó tekur þátt í undankeppni fyrir stórmót.

Eftir að hafa fengið stig í fyrsta leik gegn Finnum úti hefur ekki fengið stig eftir það í næstu sjö leikjum.

Hefur liðið aðeins skorað tvö mörk og fengið á sig á sama tíma nítján mörk en liðið var aðeins tíu mínútum frá því að ná jafntefli gegn Króatíu á dögunum.

Fadil Vokrri, forseti knattspyrnusambands Kósóvó, segir að hann hafi samþykkt að stíga til hliðar til að hleypa nýjum manni að sem muni taka við eftir leikinn gegn Íslandi í Laugardalnum en liðið mætir fyrst Úkraínu á heimavelli þann 6. október.