Dregið í riðla í Þjóðardeildinni 25. janúar

Knattspyrnusamband Evrópu, UEFA, hefur nú endanlega ákveðið fyrirkomulag og tímasetningar í kringum nýju Þjóðardeild landsliða sem hefst í september á næsta ári.

55 knattspyrnusambönd munu taka þátt og þeim verður skipt niður í fjórar deildir, A, B, C og D. Tólf efstu þjóðirnar verða í A-deild, næstu tólf í B-deild, fimmtán þjóðir verða í C-deild og síðustu sextán þjóðirnar verða í D-deild.

Íslenska liðið er í A-deild eins og staðan er í dag (11. sæti á undan Wales) en þjóðunum er raðað eftir stigaútreikningi UEFA þar sem síðustu tvær undankeppnir gilda 40% (EM 2016 og HM 2018) og undankeppni HM 2014 gildir 20 prósent.

Liðunum í A-deild og B-deild verður skipt niður í fjóra þriggja liða riðla. Sigurvegarar hvers riðils komast í fjögurra þjóða úrslitakeppni sem fer fram í júní 2019. Liðin sem vinna riðlana í hinum liðunum komast öll upp í næstu deild fyrir ofan og liðin sem enda í neðsta sæti í sínum riðlum í deildum A, B og C falla niður um deild.

Styrkleikaröðin þjóðanna mun ráðast eftir síðasta leikinn í riðlakeppni undankeppni HM 2018 en það verður síðan dregið í riðla í Þjóðardeildinni 25. janúar næstkomandi. Þá verður einnig kynntur bikar keppninnar.

Hér má sjá myndband þar sem Þjóðardeild landsliða er útskýrð.

Þjóðardeildin mun einnig bjóða upp á farseðil í úrslitakeppni EM 2020. Fjögur sæti verða í boði, eitt í hverri deild en í fjögurra þjóða úrslitakeppni um laust sæti í hverri deild komast sigurvegarar í riðlinum. Sjá útskýringu hér. 

Verði sigurvegarar riðlanna áður búnir að tryggja sér sæti á EM 2020 í gegnum hefðbundna undankeppni EM þá fær liðið sem er næst inn sætið.  Hefðbundin undankeppni EM 2020 mun fara fram frá mars  til nóvember 2019 þar sem þjóðunum verður skipt niður í tíu riðla þar sem tvær efstu þjóðirnar komast áfram.

Úrslitakeppnin um síðustu fjögur sætin mun fara fram í mars 2020 en 24 þjóða úrslitakeppni EM 2020 verður síðan í júní og júlí.