Enn blæs um Austfirði

Nú þegar mesta óveðrið er gengið niður er þó enn gul viðvörun í gildi á þremur landsvæðum.

Spáð er suðaustanstormi, með vindhraða á bilinu 18 til 25 m/s, á Norðurlandi eystra og á Austurlandi að Glettingi. Þar geta vindhviður farið yfir 35 m/s og búast má við samgöngutruflunum á síðarnefnda svæðinu.

Þá má búast við suðaustanhvassviðri eða -stormi á Austfjörðum og talsverðri snjókomu eða slyddu um tíma. Ætla má að úrkoman verði að rigningu þegar líða tekur á daginn. Þar má jafnframt búast við einhverjum samgöngutruflunum. Hiti verður á bilinu 0 til 7 stig, hlýjast syðst, en kólnar seinni partinn. 

Veðurstofan gerir ráð fyrir því að veðrið hafi að mestu gengið yfir upp úr hádegi. Þá er rafmagn jafnframt komið á alls staðar þar sem það fór af í gærkvöldi.

Það snýst svo í norðan og norðvestan 8-13 m/s með éljum á morgun. Hiti kringum frostmark.

Veðurhorfur á landinu næstu daga

Á þriðjudag:

Norðvestlæg átt, víða 8-13 m/s og rigning eða slydda SA-til, en annars skúrir eða dálítil él. Hægari og úrkomulítið með kvöldinu. Hiti 0 til 5 stig S-til að deginum, en annars vægt frost. 

Á miðvikudag:

Norðlæg átt, 10-15 m/s og slydda eða snjókoma á S-verðu landinu, en dálítil él fyrir norðan. Hiti kringum frostmark. 

Á fimmtudag:

Norðvestlæg átt, strekkingur og él NA-til, annars mun hægari og stöku él, en léttskýjað SA-til. Frost 1 til 6 stig, en frostlaust við sjávarsíðuna yfir daginn. 

Á föstudag:

Vestlæg átt með éljum, en bjartviðri eystra. Kólnandi veður. 

Á laugardag:

Norðvestlæg átt og él, en léttskýjað SA-til. Kalt í veðri. 

Á sunnudag:

Útlit fyrir hægan vind, bjartviðri og talsvert frost um land allt.