American Airlines flýgur til Íslands

Bandaríska flugfélagið American Airlines mun hefja áætlunarflug til Íslands frá og með næsta sumri. Flogið verður á milli Dallas í Bandaríkjunum og Keflavíkur.

Flugfélagið er eitt stærsta flugfélag Bandaríkjanna og mun það nota 176 sæta Boeing 757-200 flugvél á áætlunarleiðinni. Jómfrúarflugið verður þann 7. júní á næsta ári og gert er ráð fyrir að flugfélagið muni fljúga til Íslands til 26. október hið minnsta, að því er kemur fram í tilkynningu frá flugfélaginu.

„Reykjavík er gríðarlega vinsæll áfangastaður og við hlökkum til að geta veitt viðskiptavinum okkar þá þjónustu að upplifa einstakt landslag Íslands,“ er haft eftir Vasu Ruju, framkvæmdastjóra hjá flugfélaginu.