Morata: Ég er stuðningsmaður Real en leikmaður Chelsea

Hinn spænski framherji Chelsea, Alvaro Morata, útilokar ekki að ganga aftur í raðir Real Madrid síðar á ferlinum.

Morata var keyptur til Chelsea frá Real. Hann vildi ekki fara frá spænska liðinu en þurfti á því að halda að komast í lið þar sem hann fengi að spila reglulega.

„Auðvitað væri ég til í að fara einhvern tímann aftur til Real en það er flókið. Ég sagði við þjálfarann að ég vildi spila meira. Að ég hafi viljað fara frá félaginu er rugl. Ég hef aldrei sagt neitt neikvætt um félagið og mun aldrei gera. Ég er stuðningsmaður Real en leikmaður Chelsea,“ sagði Morata.

Hann var sakaður á dögunum um að vilja fara frá Chelsea þar sem hann kvartaði yfir umferðinni og veðrinu. Framherjinn var fljótur að skjóta þær raddir niður.

„Við höfum aðlagast lífinu í London vel. Þetta var erfitt í upphafi en er í góðu lagi núna.“

Morata er búinn að skora sjö mörk í tíu leikjum fyrir Chelsea í vetur.