Pútín dýfði sér í ísilagt vatn í tilefni þrettándans

Rússneska rétttrúnaðarkirkjan fagnaði þrettándanum í gær og dýfði Vladimír Pútín sér í jökulkalt vatn í tilefni dagsins. Þetta var í fyrsta skipti sem forsetinn fær sér ísbað á þrettándanum opinberlega.

Rússneskar sjónvarpsstöðvar sýndu myndir af Pútín þegar hann steig ofan í Seliger-vatnið í norðvesturhluta Rússlands.  Gat var skorið í ísinn þar sem Pútín og fleiri tilbiðjendur hættu sér ofan í hrollkalt vatnið.

Samkvæmt hefðum rétttrúnaðarkirkjunnar er vatn sem prestar blessa í þrettándavikunni talið heilagt og hreint. Trúa sumir því að vatnið hafi lækningarmátt, að því er segir í frétt AP-fréttastofunnar.

Líklega hafa fáir þjóðarleiðtogar birst eins og oft hálfnaktir á myndum og Pútín. Frægar eru myndir af honum þar sem hann sést á hestbaki eða við aðra karlmannlega iðju ber að ofan.