Segir ný gögn um Drekasvæðið grunn að næsta olíuleitarútboði

Orkustofnun áætlar að kostnaður við olíuleit á Drekasvæðinu sé kominn yfir fimm milljarða króna, þar af eru fimmhundruð milljónir í leyfisgjöld til ríkisins. Þar á bæ telja menn að efnahagslegar ástæður valdi því að erlendu félögin drógu sig út, en ný gögn gefi fyrirheit um að farið verði í nýtt útboð. Í fréttum Stöðvar 2 var rætt við Skúla Thoroddsen, lögmann Orkustofnunar og staðgengil orkumálastjóra. 

Fulltrúar Orkustofnunar hafa setið fundi sérleyfishafa en Skúli segir að þeir hafi ekki fengið neina beina yfirlýsingu um ástæður þess að ríkisolíufélögin CNOOC og Petoro drógu sig út. Hann tekur ekki undir að pólitík skýri ákvörðun þeirra, en telur að ástæðan sé fremur efnahagsleg. 

„Svæðið er miklu flóknara heldur en menn kannski áttu von á beinlínis. Það hefur verið meiri eldvirkni á svæðinu, hraunlög yfir setlögunum, þar sem olíu er að finna, eru þykkari. Þannig að það er dýrt að fara í þessar rannsóknir. 

Þannig að ég held að þetta séu kannski beinharðir peningar sem ráða því, - að það svari ekki kostnaði að svo stöddu að fara í frekari rannsóknir,“ segir Skúli.

Hann upplýsir að olíufyrirtækin hafi þegar greitt til ríkisins rúmar 500 milljónir króna í leyfisgjöld og nú hefðu gjaldfallið 60 milljónir króna á CNOOC-leyfið fyrir árið 2018. 

Þá áætlar Orkustofnun að rannsóknarkostnaður á Drekasvæðinu sé kominn yfir fimm milljarða króna. 

„Ýmsir aðrir hafa nefnt hærri tölur en það. En hann er allavega umtalsverður og sennilega ekki undir fimm milljörðum,“ segir Skúli. 

Orkustofnun telur forsendur sérleyfisins nú brostnar og segir Eykon ekki hafa burði til að halda eitt áfram. Eykon hafi nú andmælarétt til 15. febrúar og Orkustofnun muni í framhaldi af því taka ákvörðun um hvað verði um sérleyfið. Skúli vill engu svara um hvort til greina komi að veita Eykoni lengri frest. 

„Ef Eykon væri með uppi í vasanum eitthvert stórt olíufyrirtæki og legði það á borðið á morgun, þá myndum við nú hugsa okkur um. Því það er náttúrlega mikilvægt að rannsóknir haldi áfram og þær falli ekki niður. Það segir sig sjálft. Það eru hagsmunir íslenska ríkisins, sem eru í því fólgnir.“ 

En jafnvel þótt þetta sérleyfi félli úr gildi telur Skúli að olíuleitin muni halda áfram enda liggi núna fyrir mun betri gögn um Drekasvæðið. 

„Það eru kannski nýjar og aðrar forsendur til þess að fara þá í þriðja útboðið, þó að það verði kannski ekki strax. 

Og sé þarna olía, þá hefur hún verið þarna og hún verður þarna áfram. Tíminn verður þá bara að leiða það í ljós hvernig við bregðumst við því í framtíðinni.“ 

Hér má sjá frétt Stöðvar 2: