Fylkir og Fjölnir spila til úrslita

Fylkir mætir Fjölni í úrslitaleik Reykjavíkurmótsins eftir sigur á 10 mönnum KR í undanúrslitunum í Egilshöllinni í kvöld.

Andre Bjerregaard fékk rautt spjald snemma leiks fyrir að sparka í mótherja þegar þeir lágu báðir í grasinu. KR þurfti því að spila manni færri í rúman klukkutíma.

Þrátt fyrir það ríkti jafnræði með liðunum og þau gengu markalaus til leikhlés. Fylkismenn komust yfir á 76. mínútu með marki frá Orra Sveini Stefánssyni eftir hornspyrnu.

Fleiri mörk voru ekki skoruð í leiknum og unnu Fylkismenn sigur og mæta því Fjölni eins og áður segir í úrslitunum á mánudaginn.