Karlkynsklappstýru hent úr húsi fyrir ruslatal | Myndband

Íþróttalífið býður alltaf upp á eitthvað nýtt og nú er byrjað að henda klappstýrum út úr íþróttahúsum.

Nágrannaskólarnir Arizona og Arizona State kepptu í körfubolta í gær og þar misnotaði ein karlkynsklappstýran aðstöðu sína til þess að drulla yfir leikmenn andstæðinganna. Klappstýrudólgur sem er ekki algengt.

Klappstýrurnar sitja beint undir körfunni og þar öskraði klappstýran í gjallarhorn á andstæðingana sem voru að taka vítaskot.

Arizona’s cheerleader just got ejected for heckling. Officially the most savage cheerleader alive pic.twitter.com/YPMUgGbZsj

— Barstool Sports (@barstoolsports) February 16, 2018

Einum dómaranum var að lokum nóg boðið og hann henti klappstýrunni út.

„Hann var að öskra í gegnum gjallarhornið á leikmenn. Það er ekki boðlegt. Hann fékk fyrst viðvörun en það skilaði engu. Ég ákvað því að henda honum út,“ sagði dómarinn.

Klappstýran var á vegum Arizona og þrátt fyrir brottvikninguna vann Arizona leikinn, 77-70.