Lögreglumaður greip barn sem féll af þriðju hæð

Mikil mildi þykir að ekki hafi farið verr þegar barn féll fram af svölum á þriðju hæð húss í egypsku borginni Asyut. Lögreglumaður, sem starfaði við öryggisgæslu í banka á jarðhæð hússins, greip barnið þegar það féll til jarðar.

Myndband af atvikinu hefur vakið mikla athygli á netinu síðustu daga en lögreglumaðurinn, ásamt tveimur samstarfsmönnum sínum, hafði hraðar hendur þegar hann kom auga á barnið.

Í stuttri frétt breska ríkisútvarpsins af atvikinu segir að barnið hafi sloppið ómeitt og þá hlaut lögreglumaðurinn aðeins minniháttar meiðsl. Myndbandið af björguninni má sjá hér að neðan.