Lögreglan lýsir eftir strokufanga

Lögreglan á Suðurnesjum lýsir eftir Sindra Þór Stefánssyni en hann strauk frá fangelsinu að Sogni nú í nótt.  Sindri hefur sætt gæsluvarðhaldi frá 2. febrúar 2018 vegna rannsóknar lögreglunnar á umfangsmiklum þjófnaði á tölvubúnaði.  Sindri er í þróttamannslega vaxinn með skolleitt hár, skegghýjung og 192 cm á hæð.  Samkvæmt fyrirliggjandi upplýsingum strauk Sindri frá Sogni kl. 01:00.

Allir þeir sem geta veitt upplýsingar um ferðir Sindra frá því kl. 01:00 í nótt er beðnir um að koma þeim upplýsingum á framfæri við Lögregluna.

Páll Winkel fangelsismálastjóri segir í samtali við Vísi að það sé ekki óalgengt að gæsluvarðhaldsfangar séu geymdir í opnu fangelsi líkt og á Sogni eða Kvíabryggju.

Hann segir fangelsismálastofnun taka ákvörðun um að geyma gæsluvarðhaldsfanga í opnu fangelsi. Metið sé hvort að fangarnir séu hættulegir hverju sinni á þeim tíma, en allir þeir sem eru geymdir í opnu fangelsi eru taldir hættulausir gagnvart umhverfi sínu og þeim treyst fyrir því að strjúka ekki.

Páll segir fremur sjaldgæft að fangar strjúki úr opnu fangelsi og það sé mikið undir fyrir þá, enda verst fyrir þá sjálfa að strjúka. Gerist þeir sekir um strok verða þeir fluttir í lokað fangelsi og hefur það áhrif á hvernig afplánun þeirra verður háttað og hvenær þeir komast á reynslulausn.

Fréttin hefur verið uppfærð.