Níu milljóna tap Hótels 1919

Eignarhaldsfélagið Hótel 1919, sem rekur hótel undir nafni Radisson Blu við Pósthússtræti, skilaði um níu milljóna króna tapi í fyrra borið saman við hagnað upp á tæplega 38 milljónir króna á árinu 2016.

Þá drógust tekjur félagsins saman um liðlega 55 milljónir króna á milli ára og námu samtals 845 milljónum á síðasta ári, samkvæmt nýbirtum ársreikningi. Hótel 1919 er með langtímarekstrarsamning við alþjóðlegu hótelkeðjuna Rezidor Hotels ApS um rekstur hótelsins.

Launakostnaður jókst um liðlega tíu prósent frá fyrra ári og var rúmlega 298 milljónir króna á árinu 2017. Eignir í árslok 2017 námu samtals 348 milljónum en eigið fé var tæplega 191 milljón króna. Hótel 1919 er í eigu LF2 ehf., dótturfélags Landfesta, sem er jafnframt dótturfélag Eikar fasteignafélags.