Sigurmark í uppbótartíma í dramatískum sigri Þórs

Þór tryggði sér mikilvæg þrjú stig í fjórðu umferð Inkasso-deildar karla er liðið vann 3-2 sigur á Fram í rosalegum leik á heimavelli í dag.

Fyrirliðinn Sveinn Elías Jónsson kom Þór yfir á 31. mínútu og einungis mínútu síðar var Kristófer Jacobson Reyes, leikmaður Fram, sendur í sturtu. Þórsarar í kjörstöðu.

Skömmu fyrir leikhlé tvöfaldaði Alvaro Montejo forystuna og þannig stóðu leikar í hálfleik. Margir héldu að eftirleikurinn yrði auðveldur fyrir heimamenn í Þorpinu en svo var alls ekki.

Guðmundur Magnússon minnkaði muninn stundarfjórðungi fyrir leikslok og Orri Gunnarsson jafnaði metin á 80. mínútu. Allt stefndi í 2-2 jafntefli en Alvaro Montejo tryggði Þór sigurinn í uppbótartíma með sínu öðru marki.

3-2 sigur Þórsara sem eru því komnir með sjö stig og sitja í fimmta sætinu. Fram er einnig með sjö stig eftir leikina fjóra en eru í þriðja sætinu, vegna betri markahlutsfalls.

Úrslit og markaskorarar eru fengnir frá urslit.net.