Ensku landsliðsmennirnir stukku ofan í á eftir sigur á Sviss

Framherjinn Rickie Lambert er í skemmtilegu viðtali við The Telegraph í dag þar sem hann talar um stundirnar með landsliðinu og hversu mikið leikmönnum leiddist á HM árið 2014.

Skemmtilegasta minning Lambert með landsliðinu kom í Sviss er liðið hafði unnið 2-0 sigur í undankeppni EM 2016 en mikil pressa var á liðinu fyrir leikinn.

„Við vorum á hótelinu. Fengum okkur nokkra drykki og fórum svo út. Það var á þarna rétt hjá við fórum út á brúna. ég trúði því ekki hversu hátt við vorum uppi. Við byrjuðum samt að hoppa ofan í ána hver á fætur öðrum. Það voru allir að kafna úr hlátri. Þetta var skemmtilegur hópur,“ segir Lambert léttur.

Hann greinir einnig frá því að hótellífið á HM sé alls ekki auðvelt og reyni á menn.

„Undirbúningurinn var frábær en lífið í Brasilíu var erfitt því menn eru bara fastir á hótelinu. Mörgum leiddist mikið. Sumir drápu tímann með því að spjalla við sjúkraþjálfarana, aðrir spiluðu ballskák, borðtennis eða tölvuspil,“ segir Lambert.

„Það var frekar svekkjandi að geta ekki skoðað Rio almennilega. Við fórum til Portúgal og Bandaríkjanna fyrir mótið og þá var minni áhugi og við komumst aðeins út. Slíkir dagar þétta hópinn og ef Southgate getur gert meira af því þá verður allt léttara. Það munar um að komast út að borða og fá kannski tvo drykki. Menn verða að geta líka slakað á því menn eru undir mikilli pressu.“

Lambert er orðinn 36 ára í dag og lagði skóna á hilluna á síðasta ári.