Kobba með nýjan kóp

Landselsurtan Kobba kæpti snemma í gærmorgun í Húsdýragarðinum. Kópurinn hefur enn ekki verið kyngreindur og því ekki fengið nafn enda fara dýrahirðar garðsins varlega í kringum íbúa hans fyrstu dagana.

Litið var í heimsókn til kópsins nýja í kvöldfréttum Stöðvar 2.

Kópurinn þiggur móðurmjólk oft á sólarhring og var fljótur til að fylgja móður sinni á sundi. Faðir kópsins er brimillinn Snorri en auk fjölskyldunnar er urtan Særún einnig í lauginni. Kópurinn verður á spena í um fjórar vikur áður en hann fer að taka fisk.