Rússneska mínútan: Gott að sofa í rússneskri rútu

Rússland er gríðarstórt land, það stærsta í heiminum. Því ætti ekki að koma mikið á óvart að landslið, starfslið, fjölmiðlafólk, stuðningsmenn og allir aðrir sem koma að heimsmeistaramótinu þar í landi þurfi að leggja á sig nokkur ferðalög.

Íslenska karlalandsliðið hafði bækistöðvar við Svartahafið, í smábænum Gelendzhik. Í næsta bæ við voru höfuðstöðvar íslenskra fjölmiðlamanna. Þaðan var ferðast til borganna þar sem Ísland spilaði leiki sína á HM.

Ferðalög geta tekið á, sérstaklega eftir langan og strangan dag.

Björn Sigurðsson, myndatökumaður Vísis og Stöðvar 2, ákvað að skella sér í smá göngutúr í einu rútuferðalagi íslenska fjölmiðlahópsins þar sem nær allir íslensku fjölmiðlamennirnir voru svo steinsofandi að þeir tóku ekkert eftir uppátæki Bödda.

Afraksturinn mátti sjá í Rússnesku mínútunni í Sumarmessunni í kvöld. Sumarmessan er á dagskrá á Stöð 2 Sport klukkan 21:00 að kvöldi hvers leikdags á HM.