Átti að vera leikurinn þar sem við tökum þrjú stig

Strákarnir okkar reyndu að bera höfuðið hátt á æfingu sinni í Rússlandi í morgun. Þrátt fyrir sárt tap í gær þá á Ísland enn möguleika á að komast áfram.

„Það er oft erfitt að ná sér niður eftir leiki. Þetta var rysjótt nótt en menn eru vaknaðir og farnir að hugsa um næsta verkefni,“ segir Hannes Þór Halldórsson jákvæður í morgunsárið. Birkir Bjarnason bætir við að þetta hafi verið mjög sárt tap.

„Þetta var erfitt og gríðarlega svekkjandi. Sérstaklega þar sem þetta átti að vera leikurinn þar sem við ætluðum að ná þremur stigum. Svona er fótboltinn. Við verðum að byrja aftur og gera betur í næsta leik.“

Það var mikill hiti í Volgograd í gær sem hafði skiljanlega mikil áhrif á liðin en þó aðallega okkar menn sem eru ekki vanir þetta miklum hita.

„Þú verður eiginlega að spyrja miðjumennina og þá sem eru að skila 5-10 kílómetrum í leik. Ég er ekki að skila nema fimm. Ég var samt mjög þyrstur og alltaf að sækja vatn. Fann að tók toll. Mér finnst ekkert ólíklegt að þetta hafi tekið nokkur prósent úr strákunum sem hlaupa mest,“ segir Hannes en Birkir viðurkennir að hitinn hafi vissulega haft sín áhrif.

„Miðað við hvernig þessi leikur þróaðist í seinni hálfleik þá var þetta mjög erfitt. Síðustu 20 mínútur held ég að margir hafi verið búnir sem er skiljanlegt. Þetta var gríðarlega erfitt.“

Vísir er með öflugt teymi í Rússlandi sem verður með ítarlegan fréttaflutning af íslenska liðinu á HM. Fylgist með á samfélagsmiðlum okkar - á Facebook, Twitter og Instagram.