Eiga enn eftir að læra nafnið hans Hannesar

Hannes Þór Halldórsson samdi í gær við aserska félagið Qarabag og spilar nú með félagið sem hefur sett stefnuna á það að spila annað árið í röð í Meistaradeildinni.

Qarabag býður Hannes velkominn á samfélagsmiðlum félagsins en menn þar á bæ eru ekki alveg búnir að læra nafnið á nýja markverði sínum.

Þeir reyna samt við íslenskuna og segja „Velkominn“ fyrir ofan mynd af Hannesi í markmannsbúningi Qarabag. En svo er komið að því að skrifa nafn íslenska markvarðarins.

Qarabag býður nefnilega Hannes Tur Halldorsson velkominn til félagsins. Auðvitað gæti Tur verið borið fram sem Þór á  asersku. Þór er vanalega skrifaði sem Thor á erlendum tungumálum.

Hvort sem það er eða ekki þá kemur þetta svolítið fyndið út fyrir okkur Íslendinga eins og sjá má hér fyrir neðan.

Sabahınız xeyir   böyük #QarabağFK ailəsi! pic.twitter.com/1GNVb7QRSR

— Qarabağ FK (@FKQarabagh) July 4, 2018

 

Hannes er mjög ánægður með að fá að prófa nýtt ævintýri á framandi stað eins og kom fram í viðtali við hann í morgun.

Hannes mun búa í Bakú við Kaspíahaf og þar mun örugglega fara mjög vel um okkar mann og fjölskyldu hans.

Miðað við frammistöðu Hannesar Þórs með Randers og íslenska landsliðinu á síðustu árum verður íslenski landsliðsmarkvörðurinn örugglega mjög fljótur að skapa sér rétt nafn hjá stuðningsmönnum og forráðamönnum Qarabag.