Napoli var boðið að kaupa Ronaldo: Hefði getað gert félagið gjaldþrota

Cristiano Ronaldo er mættur til Torino og verður kynntur sem nýr leikmaður ítalska stórveldisins Juventus í dag.

Juventus borgar 105 milljónir punda fyrir þennan besta knattspyrnumann heims auk þess sem félagið þarf að punga út stjarnfræðilegum upphæðum í laun handa kappanum.

Aurelio De Laurentiis, forseti Napoli, segir að félaginu hafi einnig verið boðið að kaupa Ronaldo en Napoli hafnaði í 2.sæti ítölsku úrvalsdeildarinnar á síðustu leiktíð.

Fjárhagslegi pakkinn reyndist Napoli hins vegar ofviða að sögn forsetans.

„Napoli var líka boðið að kaupa Ronaldo. (Jorge) Mendes, umboðsmaður Ronaldo, hringdi í mig. Við skoðuðum alla fleti og reiknuðum út hvort við myndum ráða við þetta, fjárhagslega.“

„Þessi peningur sem Juventus er að eyða í Ronaldo er eitthvað sem við ráðum ekki við. Við hefðum skapað áhættu fyrir framtíð Napoli. Þessi samningur hefði getað gert félagið gjaldþrota,“ segir De Laurentiis.