Inter bíður með að klára kaup á Vidal til að reyna við Modric

Ítalska úrvalsdeildarliðið Internazionale hefur gert Real Madrid tilboð í króatíska miðjumanninn Luka Modric.

Þetta herma heimildir Sky Italy og samkvæmt sömu heimildum hefur Luka Modric áhuga á að ganga í raðir ítalska liðsins þar sem hann myndi hitta fyrir landa sína Ivan Perisic, Sime Vrsaljko og Marcelo Brozovic.

Inter ætlar sér stóra hluti á komandi leiktíð undir stjórn Luciano Spalletti en liðið hefur fengið öfluga leikmenn til liðs við sig í sumar í þeim Radja Nainggolan, Stefan de Vrij, Lautaro Martinez auk Vrsaljko sem kom frá Atletico Madrid í gær.

Þá er Inter langt komið með kaup á Arturo Vidal frá Bayern Munchen en hafa þær viðræður verið settar á bið í kjölfar tilboðsins í Modric.



Inter verður aftur með í Meistaradeild Evrópu á komandi leiktíð eftir sex ára fjarveru en liðið hafnaði í 4.sæti Serie A á síðustu leiktíð.