Guðni Bergs: Erfitt að viðhalda þessum árangri

Íslenska karlalandsliðið í fótbolta æfði í Schrun í Austurríki í síðasta skipti í dag. Liðið hélt til St. Gallen eftir æfinguna þar sem liðið mætir Sviss á laugardag.

Guðni Bergsson, formaður KSÍ, var mættur til Austurríkis og ræddi við Guðmund Benediktsson í kvöldfréttum Stöðvar 2.

„Eins og alltaf með nýjum þjálfara er nýtt upphaf að vissu leiti. Við erum að byggja á grunni, góðum árangri sem hefur náðst undanfarin ár og við ætlum að virða það,“ sagði Guðni.

„Byggja á þeim gildum sem hafa dugað okkur vel en auðvitað koma nýjar áherslur með nýjum manni.“

„Ég held að við séum bara bjartsýn á framhaldið, en vissulega er byrjunin á hans ferli með liðið erfið.“

Ísland hefur farið á síðustu tvö stórmót og er nú í frábærum séns á að komast á það þriðja, liðið hefur líklega aldrei staðið eins vel að vígi þegar kemur að undankeppni EM. Guðni segir alveg hægt að gera kröfu á landsliðið að komast aftur á stórmót.

„Við áttum okkur á því að það er erfitt að viðhalda þessu og í því fellst verkefnið okkar.“

„Liðið er aðeins að eldast og við verðum líka að horfa aðeins fram á veginn,“ sagði Guðni Bergsson.