Sif: Þetta er þessi mikilvæga markamínúta

Sif Atladóttir miðvörður Íslenska landsliðsins í fótbolta var einbeitt á næsta leik liðsins þegar Vísir náði tali af henni skömmu eftir leik. Sif barðist vel í vörninni í dag en gat þó ekki stoppað Svenju Huth sem skoraði í tvígang fyrir Þýskaland.

Pínu svekkjandi, en möguleikinn lifir ennþá?

„Já, við þurfum bara að, fá hausinn okkar niður núna bara í kvöld og byrja að einbeita okkur að þriðjudeginum bara strax.”

Hversu sárt er samt að fá þetta mark þarna rétt í lokinn af fyrri hálfleiknum?

„Þetta er þessi markamínúta en ég meina við vissum alveg að þetta yrði erfitt en hérna, þetta bara gekk ekki í dag.”

Svenja Huth skoraði fyrsta mark leiksins á 42. mínútu en þangað til hafði íslenska liðið varist vel og ekki hleypt Þjóðverjum í mikið af færum.

Þið voruð alveg í möguleika allan tímann og náið að standa þokkalega í þeim?

„Já, við erum gott skipulagt varnarlið og við vissum að við gætum gert þær svolítið pirraðar og svona. Þetta var svolítið crucial markamínúta sem þær skoruðu á, en við héldum áfram og þurftum að fara að sækja og þá opnaðist aðeins fyrir þær en ég meina svona er fótboltinn. Hann gengur stundum upp og stundum ekki, nú er bara nýtt markmið og það er að vinna á þriðjudaginn.”

Þjóðverjar skoruðu ekki sitt annað mark fyrr en á 74. mínútu svo Ísland var svo sannarlega lengi inni í þessum leik. Jafntefli í dag hefði sett Ísland í mjög góða stöðu fyrir þriðjudaginn en eftir tapið í dag þurfa þær að fara í umspil ef þær ætla á HM.

Hefðuð þið kannski átt að setja aðeins meiri kraft í sóknaraflið þarna í seinni hálfleik?

„Já maður getur svo sem alltaf verið vitur eftirá en við þurftum bara eitt mark og maður veit aldrei. Við erum með gott skyndisóknarlið og við erum sterkar varnarlega, maður getur verið vitur á, við þurfum að skoða þetta við ætlum bara að endurfókusera hausinn og taka Tékkana á þriðjudaginn í staðinn,” sagði Sif Atladóttir.