Kreditkortanotkun verði ódýrari

Ný lög um greiðslukortaviðskipti gætu sparað neytendum rúmlega milljarð á ári, samkvæmt útreikningum fjármálaráðuneytisins.

Í frumvarpsdrögunum, sem fjármálaráðherra hyggst leggja fram, er kveðið á um að hámark verði sett á milligjöldin sem greiðslukortafyrirtæki rukka fyrir notkun kortanna. Fyrirtækin mega í dag innheima 0,2 prósent af fjárhæð greiðslunnar þegar notað er debetkort en 0,6 prósent þegar greitt er með kreditkorti.

Nýju lögin myndu hins vegar lækka kreditkortahámarkið um helming, niður í 0,3 prósent, en áfram mætti innheimta 0,2 prósent að hámarki við notkun debetkorta. Lögin kveða að sama skapi á um bann við svæðisbundnum takmörkunum í leyfissamningum.

Verði frumvarpið að lögum áætlar fjármálaráðuneytið að það gæti sparað neytendum um 1,15 milljarð á ári - að því gefnu að breytingin muni skila sér að fullu til neytenda. Að sama skapi gæti breytingin lækkað tekjur greiðslukortafyrirtækjanna og gæti því dregið úr hvata þeirra til gefa út greiðslukort.