Lögregla vill ná tali af fólkinu á myndinni

Lögreglan á höfuðborgarsvæðinu óskar eftir að ná tali af einstaklingunum á meðfylgjandi mynd vegna máls sem hún hefur til meðferðar. Þeir eru vinsamlegast beðnir um að hafa samband við lögreglustöðina á Hverfisgötu 113-115 í Reykjavík í síma 444 1000.

„Myndin er vissulega óskýr, en þó má ætla að klæðaburður viðkomandi geti mögulega hjálpað til við að bera kennsl á þá sem þarna eru á ferð,“ segir í tilkynningu lögreglu.

Þeir sem þekkja til einstaklinganna á myndinni eða vita hvar þá er að finna eru beðnir um að hringja í lögregluna, en upplýsingum má jafnframt koma á framfæri í tölvupósti á netfangið gudrun.jack@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.