Segist ekki hafa vitað af tengslum Facebook við fyrirtæki sem beindi spjótum sínum að Soros

Mark Zuckerberg, stofnandi og forstjóri Facebook, tók til varna í samtali við blaðamenn í gær þegar hann sagðist ekkert hafa vitað af því að fyrirtæki hans hefði fengið almannatengslafyrirtæki til liðs við sig til að grafa undan gagnrýnendum Facebook.

Fyrirtækið, Definers Public Affairs, kom þeim skilaboðum meðal annars ítrekað á framfæri að milljarðamæringurinn og gyðingurinn George Soros stæði á bak við ófrægingarherferð gegn Facebook.

Zuckerberg segist fyrst hafa frétt af þessu í ítarlegri umfjöllun New York Times um Facebook sem birtist fyrr í vikunni.

„Um leið og ég komst að þessu sagði ég teyminu okkar að við myndum ekki halda áfram að vinna með þessu fyrirtæki,“ sagði Zuckerberg en ýjaði þó að því að Soros væri í raun á bak við grasrótarsamtök sem hafa gagnrýnt Facebook harðlega, þar á meðal Freedom from Facebook.

„Það átti ekki að ráðast gegn tilteknum einstaklingi heldur að sýna að samtök sem létu líta út fyrir að þau væru grasrótarsamtök væru í raun fjármögnuð af, eða við skulum bara segja að þetta voru ekki sjálfsprottin grasrótarsamtök. Ég ber mikla virðingu fyrir George Soros þó að við séum ósammála um áhrif og mikilvægi internetsins,“ sagði Zuckerberg.

Zuckerberg svaraði spurningum blaðamanna í kjölfarið á grein New York Times sem afhjúpaði hvernig stjórnendur Facebook hafa tekist á við ýmis vandamál undanfarið, til að mynda áhrif erlendra ríkja á kosningar, hatursorðræðu og Cambridge Analytica-skandalinn.

 

Áður hafði Facebook sent frá sér yfirlýsingu vegna greinarinnar þar sem því var hafnað að herferðir Definers Puclic Affairs væru andgyðinglegar, en þekkt er að Soros og samsæriskenningar tengdar honum eru notaðar í andgyðinglegri umræðu á Facebook.