„Guðfaðir“ handtekinn á Sikiley ásamt tugum annarra meintra mafíósa

Ítalska lögreglan handtók í dag yfirmann sikileysku mafíunnar, „guðföður“ þess glæpahóps, og 45 aðra meinta mafíósa í aðgerðum yfirvalda gegn skipulagðri glæpastarfsemi á Sikiley. Greint er frá málinu á vef Guardian og vísað í aðstoðarforsætisráðherra landsins, Luigi Di Maio.

Fyrrum capo di capi, eða stjóri stjóranna, yfirmaður mafíunnar, Salvatore „Toto“ Riina, lést í fangelsi á síðasta ári. Hann hafði þá setið inni í tæp 25 ár fyrir að hafa skipað fyrir um tugi morða, þar á meðal morðin á tveimur þekktustu dómurum Ítalíu sem voru hvað mest andsnúnir mafíunni.

„Guðfaðirinn“ sem handtekinn var í dag, Settimino Mineo, er höfuð mafíufjölskyldnanna í Palermo, höfuðborg Sikileyjar. Yfirvöld segja að hann hafi verið nýverið verið gerður að yfirmanni mafíu allrar eyjarinnar sem kölluð er Cosa Nostra.