66 látnir eftir að olíuleiðsla sprakk í Mexíkó

Yfirvöld í Mexíkó segja 66 vera látna eftir sprengingu sem varð í olíuleiðslu í gærkvöldi, tugir eru slasaðir.

BBC greinir frá því að sprenging hafi orðið eftir að olíuþjófar höfðu rofið leiðsluna nærri bænum Tlahuelilpan í Hidalgo-ríki. Yfirvöld segja að mikill fjöldi fólks hafi í kjölfarið ruðst að leiðslunni og freistað þess að safna eins mikilli olíu og unnt var í ýmis ílát.

Því var mikill fjöldi staddur uppi við leiðsluna þegar sprengingin varð, myndskeið frá vettvangi sýnir umfang eldsvoðans og í sjónvarpsfréttum í Mexíkó voru sýndar myndir af fólki með alvarleg brunasár.

Olíuþjófnaður er alvarlegt vandamál í Mexíkó en auk þess að vera stórhættuleg iðja kostaði þjófnaður sem þessi Mexíkó yfir þrjá milljarða Bandaríkjadala á síðasta ári.

Tólf létust í sambærilegu slysi í Nígeríu fyrir viku síðan.