Þrastalundur segir skilið við áhrifavaldana og snarlækkar verð

Söluskálinn Þrastalundur í Grímsnesi gengur nú í gegnum endurnýjun lífdaga. Nýir rekstraraðilar tóku við staðnum skömmu fyrir jól og hafa nýtt síðastliðinn mánuð til að breyta áherslum, stokka upp í matseðlinum og lækka verð á mörgum vörum.

Þrastalundur er vinsæll áningarstaður á Suðurlandi, þangað sem ferðamenn og áhrifavaldar leggja reglulega leið sína. Staðurinn hefur ítrekað ratað í fréttirnar á síðustu misserum, ekki aðeins fyrir sýnileika á samfélagsmiðlum og auðveldu aðgengi að áfengi í kjörbúð Þrastalundar, heldur einnig fyrir hátt verðlag. Til að mynda var verð á hálfslítra vatnsflösku lækkað hressilega eftir símtal frá blaðamanni í upphafi síðasta árs, auk þess sem hátt núðluverð kom flatt upp á eiganda Þrastalundar, Sverri Einar Eiríksson, síðastliðið haust. Í báðum tilfellum var um „mistök í verðlagningu“ að ræða.

Nýir rekstraraðilar Þrastalundar, þeir Celio Sosa og Björn Þór Baldursson, ætla sér hins vegar að tryggja að fleiri slík mistök verði ekki gerð. Þrátt fyrir að þeir hafi töluverða reynslu af veitingarekstri, til að mynda hafa þeir rekið veitingastaðinn Surf and Turf á Selfossi frá árinu 2013, er rekstur Þrastalundar allt annars eðlis. Söluskálinn er enda ekki bara veitingastaður, þar má jafnframt finna kaffiteríu og fyrrnefnda kjörbúð - en að sögn Björns stendur til að umbylta tilgangi hennar.

Sjá einnig: Hátt núðluverð í Þrastalundi kom eigandanum á óvart



Í stað þess að reyna að græða sem mest á kjörbúðinni, eins og fyrrnefnd verðlagsdæmi gefa kannski vísbendingu um, er ætlun hennar í dag að trekkja að viðskiptavini. Það verði gert með því að bjóða upp á lægra verð en þekkst hefur og bjóða upp á vörur sem hin fjölmenna sumarbústaðabyggð Grímsnesins þarf á að halda. „Verslunarreksturinn er þjónusta,“ eins og Björn kemst að orði. „Við viljum fá Íslendinga til baka og til þess þarf að breyta ímynd Þrastalundar.“

Hann segir að gróflega megi fullyrða að vöruverðið í kjörbúðinni hafi verið lækkað um helming, í sumum tilfellum enn meira. Til að mynda kostar kaffibollinn í Þrastalundi 250 krónur í dag, en kostaði um 590 krónur áður. Björn segist hafa gert verðkannanir víða áður en verðlagið var ákveðið og að ætlunin sé að halda því áfram, til að halda sér á tánum og bjóða upp á sem lægst verð í kjörbúðinni.

Nefnir hann í því samhengi að hann selur lítra af mjólk á 200 krónur, umtalsvert lægra verði en tíðkaðist í Þrastalundi fyrir áramót og lægra verði en gengur og gerist á bensínstöðvum og vegasjoppum. „Ég get kannski ekki boðið upp á „Bónusverð“ á öllum vörum en ég er víða nokkuð nálægt því,“ segir Björn. Þar að auki segir hann að vöruúrvalið hafi verið aukið, til að mynda sé Þrastalundur farinn að bjóða upp á tóbak. „Við fengum fjölmarga til okkar á fyrstu dögunum sem svekktu sig á því að þurfa að keyra á Selfoss eftir sígarettum. Við ákváðum því að byrja að selja þær, til að spara þeim aksturinn.“

Það er þó ekki aðeins kjörbúðin sem mun taka breytingum. Hinn margumtalaði veitingastaður, sem laðaði að sér brönsborðandi áhrifavalda, hefur einnig verið endurhugsaður. „Nú er nýr matseðill í gangi sem samanstendur af úrvali nýrra rétta svo sem forréttir, súpur, hamborgarar, samlokur, steikur, fiskréttir, BBQ rif, pasta, kjúklingabringur og eftirréttir svo eitthvað sé nefnt,“ segir til að mynda í einu auglýsingunni sem nýir rekstraraðilar hafa sent frá sér og birtist á Facebook-síðu Þrastalundar.

Engar pizzur og brönsinn búinn

Glöggir aðdáendur staðarins tóku eftir að þar er ekki minnst einu orði á eldbökuðu pizzurnar, sem notið höfðu töluverðra vinsælda. Björn segir því marga pizzusólgna viðskiptavini hafa verið svekkta þegar hann tjáði þeim að þær væru ekki lengur á matseðlinum. Þrátt fyrir vinsældir hafi pizzubökunin hreinlega ekki staðið undir sér.

„Það kostaði um hálfa milljón á mánuði að kynda eldofninn, auk þess sem við þurftum að vera með aukastarfsmenn í eldhúsinu og í sal. Það rataði auðvitað út í verðlagið á pizzunum og fyrir vikið veigraði fólk sér kannski við að panta þær. Þetta var einfaldlega vara sem gekk ekki upp,“ segir Björn. Að sama skapi er dögurðurinn, brönsdiskarnir svokölluðu, á bak og burt. Björn segist þó vona að það komi ekki að sök. Nóg annað sé á matseðlinum sem ætti að seðja svanga.

Sjá einnig: Brönsinn í Þrastalundi milli tannanna á fólki

Það hefur ekki mikið farið fyrir enduropnun staðarins. Aðeins hefur ein auglýsing birst á Facebook-síðu Þrastalundar og engir áhrifavaldar hafa verið fengnir til að sitja fyrir og horfa út um gluggann. Aðspurður segir Björn að hugmyndin hafi hreinlega ekki verið að básúna enduropnuninni neitt sérstaklega. Þeir Celio hafi viljað fara hægt í sakirnar og vanda sig, því margt hafi verið að í rekstri staðarins.

Þess vegna hafi þeir ætlað sér að nýta næstu mánuði, áður en álagið eykst með hækkandi sól, til að koma rekstrinum í rétt horf, slípa til vankanta og bregðast við óskum nærsveitunga og annarra viðskiptavina. Þrastalundur sé sögufrægur staður sem beri að koma fram við af virðingu.

„Ég man eftir að komið hingað 10 ára gamall og keypt mér ís. Nú er ég að verða sextugur og á margar góðar minningar héðan,“ segir Björn Þór Baldursson