Ragnheiður íhugar framboð til formanns KSÍ

Ragneiður Ríkharðsdóttir fyrrverandi alþingismaður íhugar að bjóða sig fram til formanns KSÍ en þetta tilkynnti hún á Facebook síðu sinni í kvöld.

Fótbolti.net greindi fyrst frá en í færslunni skrifar Ragnheiður að hún velti því nú fyrir að gefa kost á sér í embætti formanns KSÍ. Hún segir að það gæti hleypt fjöri í kosninguna og að reynsla sín gæti nýst í starfinu.

Ragnheiður er fyrrverandi þingflokksformaður Sjálfstæðisflokksins og sat á Alþingi fyrir Sjálfstæðisflokkinn frá 2009 til 2016. Þar áður var hún bæjarstjóri í Mosfellsbæ frá 2002 til 2007.

Geir Þorsteinsson bauð sig fram á dögunum gegn sitjandi formanni, Guðna Bergssyni, en ársþing KSÍ fer fram níunda febrúar. Það er því um mánuður til stefnu.

Færsla Ragnheiðar í heild sinni:

Í ljósi þess að Geir Þorsteinsson ætlar að bjóða sig fram til formanns KSÍ á nýjan leik þá er ég að velta fyrir mér að gefa kost á mér líka. Held að það gæti hleypt fjöri í kosninguna. Ég hef mikla stjórnunarreynslu sem og reynslu af félagsmálum, áhugamanneskja um fótbolta frá barnsaldri bæði sem dóttir og mamma, held að þessi reynsla mín gæti nýst í starfinu.