Chris Brown handtekinn fyrir nauðgun

Tónlistarmaðurinn Chris Brown hefur verið handtekinn í París í Frakklandi og er hann grunaður um nauðgun. 24 ára gömul kona hefur sakað hann um að hafa nauðgað sér á hóteli í borginni þann 15. janúar. Konan mun hafa lagt fram kæru í gær og var Brown handtekinn í kjölfarið.

Tveir aðrir voru handteknir með Brown og er annar þeirra lífvörður tónlistarmannsins, samkvæmt AP fréttaveitunni.



Blaðamenn franska tímaritsins Closer hafa heimildir fyrir því að lögreglan hafi framkvæmt rannsókn á Mandarin Oriental hótelinu í París, þar sem Brown hefur gist að undanförnu. Konan mun hafa hitt Brown á skemmtistað í París og sagði lögreglunni að hún hefði farið með honum og öðrum konum á hótelherbergi hans.



Þar hafi hún endað ein með honum og segir hún hann hafa nauðgað sér. Hún segir vin Brown og lífvörð hans einnig hafa brotið á sér.

Brown, sem er 29 ára gamall, hefur ítrekað komist í kast við lögin síðan hann játaði árið 2009 að hafa ráðist á þáverandi kærustu sína, Rihönnu. Hann var á skilorði vegna þess máls til ársins 2015.