Segir sorglegt að sjá #freethenipple notað til réttlætingar

Nanna Hermannsdóttir, ein þeirra sem stóðu að baki #freethenipple byltingunni á sínum tíma, segir sorglegt að heyra fólk nota nafn brjóstabyltingarinnar til þess að réttlæta sjónarmið sem hún sneri í raun gegn. Þetta segir Nanna í pistli undir yfirskriftinni „Nektarmálverk og brjóstabylting“.

Tilefnið eru málverk eftir Gunnlaug Blöndal af berbrjósta konum sem fjarlægð voru af skrifstofu yfirmanns í Seðlabankanum annars vegar og af gangi hins vegar. Málið þykir umdeilt og skiptust fulltrúi jafnréttisstofu og safnstjóri Listasafns Reykjavíkur meðal annars á skoðunum hvað þetta mál varðaði í Kastljósi í gærkvöldi. Þá hafa leiðari og bakþankar í Fréttablaðinu  undanfarna daga snúist um málið.

Nanna tók einnig þátt í Demoncrazy sýningunni þar sem berbrjósta stelpur sátu fyrir í rýmum þar sem uppi á veggjum voru myndir af jakkafataklæddum mönnum í valdastöðum. Meðal annars á Alþingi og í fundarherbergi hjá KR, knattspyrnufélagi Reykjavíkur.

Sýningin vakti mikla athygli og var Sigmundur Davíð Gunnlaugsson meðal þeirra sem gagnrýndu myndatökurnar í Alþingishúsinu.

DEMONCRAZY from Borghildur Indriðadóttir on Vimeo.

Klæjaði í puttana

„Ætli ein mest deilda frétt helgarinnar hafi ekki verið sú að opinber stofnun hafi tekið tillit til beiðni starfsmanna og fjarlægt listaverk af nöktum konum af skrifstofum yfirmanna. Myndirnar höfðu valdið starfsmönnum óþægindum. Þó mig hafi klæjað í puttana hef ég ekki nennt að svara þeim röddum sem vilja stimpla þetta sem viðkvæmni hjá starfsmönnunum,“ segir Nanna í pistli sínum.

Nanna er ekki aðeins öllum hnútum kunnug þegar kemur að #freethenipple og Demoncrazy heldur er móðir hennar, Rannveig Sigurðardóttir, aðstoðarseðlabankastjóri.

Listamaðurinn Goddur er meðal þeirra sem hafa gagnrýnt ákvörðun Seðlabankans að færa til málverk Gunnlaugs.

„Í morgunútvarpi Rásar 2 í gærmorgun tengdi listamaðurinn Goddur ákvörðun stofnunarinnar við frelsun geirvörtunnar og feminíska baráttu. Sambærileg rök komu fram í Kastljósi gærkvöldsins frá safnstjóra Listasafns Reykjavíkur, Ólöfu Sigurðardóttur. Þá fóru fingurnir að hreyfast á lyklaborðinu,“ segir Nanna sem settist við skriftir.

Segir sorglegt að tengja við #FreeTheNipple

„Það er sorglegt að heyra einhvern nota nafn brjóstabyltingarinnar til þess að réttlæta sjónarmið sem hún snerist í raun gegn. #FreeTheNipple snýst um að rétt kvenna til að stjórna því hvernig brjóst þeirra eru sýnd og skilgreind. Brjóstabyltingin snýst ekki um að karlar megi núna hafa naktar konur á skrifstofunni sinni ef undirmönnum þeirra og samstarfsfélögum finnist það óþægilegt.“

Þá gangi Demoncrazy jafnframt út á að berbrjósta ungar konur ögri þeirri jakkafataklæddu, miðaldra og karlkyns ímynd valdsins sem þær hafa alist upp við. 

„Markmiðið er ekki að ýta undir valdaójafnvægi með því að ögra kvenkyns starfsmönnum.“

Sitt sýnist hverjum sem fyrr segir og veltir Nanna fyrir sér hvort sé mikilvægara. Réttur fólks til að líða vel í sínu starfsumhverfi eða réttur yfirmanna til þess að velja listaverk á skrifstofuna sína.

„Vandamálið er ekki listin, heldur staðsetning listarinnar, þær aðstæður og umhverfi sem hún er sýnd í. Alveg eins og þú ferð kannski ber að ofan í sund - en ert ekki ber að ofan í vinnunni. Líklega hvorugt þó ef þú ert kona,“ segir Nanna.

„List sem veldur starfsfólki óþægindum á ekki heima uppi á vegg hjá yfirmönnum þeirra. Að kalla þetta ritskoðun sýnir að viðkomandi hefur ekki skilið um hvað málið snýst í raun.“