Rekinn af velli eftir að hafa spilað 149 leiki í röð

Draumur varnarmannsins Francesco Acerbi hjá Lazio að slá met Javier Zanetti yfir flesta leiki spilaða í röð í ítölsku úrvalsdeildinni dó í gær.

Hann var þá rekinn af velli í 2-1 tapi gegn Napoli. Hann fékk tvö gul spjöld í leiknum. Hann fer nú í leikbann og nær ekki 150 leikjum í röð. Met Zanetti er 162 leikir í röð.

Acerbi hafði spilað alla leiki Lazio síðan 18. október árið 2015. Það eitt og sér er magnaður árangur. Hann bað félaga sína afsökunar á að hafa brugðist þeim.

Þjálfarinn hans, Simone Inzaghi, sagði að brottreksturinn hefði verið rangur dómur en það var ekki deilt við dómarann í gær frekar en oft áður.