Segir atkvæðagreiðslu um verkfallsaðgerðir hefjast í næstu viku og vísar ummælum fjármálaráðherra á bug

Ragnar Þór Ingólfsson, formaður VR, segir að fyrstu verkfallsaðgerðir verkalýðsfélagsins komi til með að beinast gegn „hinum breiðu bökum ferðaþjónustunnar,“ það er, stórum fyrirtækjum á sviði þjónustu við erlenda ferðamenn á Íslandi. Hann segir að atkvæðagreiðsla um aðgerðirnar innan raða þeirra félagsmanna VR sem aðgerðirnar ná til muni hefjast á föstudag.

„Við erum búin að funda alla helgina og skipuleggja aðgerðarplan. Það mun beinast gegn stórum fyrirtækjum í ferðaþjónustunni. Við munum kynna það aðgerðaplan í lok vikunnar, á föstudaginn næsta. Kosningar á meðal þeirra félagsmanna sem aðgerðirnar ná yfir munu hefjast þann dag.“

Þá mun atkvæðagreiðsla meðal ræstingafólks og starfsmanna veitingahúsa og hótela innan Eflingar hefjast á morgun. Því er ljóst að komi til verkfallsaðgerða hjá stéttarfélögunum er ferðaþjónustan fyrsta skotmark þeirra í kjarabaráttunni.

Hvetur fjármálaráðherra til að kynna sér kröfugerðir stéttarfélaganna

Aðspurður út í ummæli Bjarna Benediktssonar, fjármála- og efnahagsráðherra, um að aðilar kjarasamningaviðræðna virðist sjálfir ekki vissir um hvað verið sé að ræða, auk þess sem hann furðaði sig á því hve langan tíma viðræðurnar hafa tekið, vísaði Ragnar þeim orðum ráðherrans alfarið á bug.

Sjá einnig: „Menn eru ekki einu sinni sammála um hvað var rætt um“

„Ég hvet hann til að lesa kröfugerðir félaganna. Þær eru alveg skýrar og það liggur alveg fyrir hverjar þær eru. Okkar nálgun á viðræðurnar hafa verið með mjög ábyrgum hætti. Þær hafa verið mjög ljósar og skýrar okkar kröfur. Hins vegar hefur þetta kannski meira staðið í okkar viðsemjendum að vilja fara með þær út og suður og vilja túlka þær eða rangtúlka þær eins og hugsast getur. Ég hafna því alfarið að við séum að misskilja eitt eða neitt.“

Þá vísar Ragnar ummælum Bjarna um að átök á atvinnumarkaði hafi verið sjálfstætt markmið stéttarfélaganna einnig á bug

„Það hefur alltaf verið markmið okkar frá upphafi að ná kjarasamningum, góðum kjarasamningum og það er enn þá okkar skýra markmið. Við erum alltaf tilbúin til þess að setjast niður og ræða málin en þegar lokatilboð okkar viðsemjenda er kaupmáttarrýrnun handa okkar félögum eftir allt sem hefur á undan gengið í okkar samfélagi þar sem efsta lagið hefur mokað nánast óheflað til sín því sem að það telur vera til skiptanna í íslensku samfélagi þá hljóta allir að sjá það að þessi pattstaða er ekki okkur að kenna,“ sagði Ragnar og bætti því við að mikill samningsvilji væri innan raða VR og sagði hann að svo yrði áfram.