Erlendir miðlar um WOW: Norskur sérfræðingur segir byrjunarstöðu WOW hafa verið erfiða

Þúsundir farþega víða um heim komast ekki leiðar sinnar eftir að starfsemi WOW air var hætt nú í morgun. Það helsta sem fjölmiðlar ytra fjalla um, enn sem komið er, er hve margir eru strandaglópar á flugvöllum heimsins og það að mörg lággjaldaflugfélög hafa orðið gjaldþrota að undanförnu.

Þá segir norskur sérfræðingur að byrjunarstaða WOW air hafi verið sérstaklega slæm og erfitt hafi verið að láta reksturinn ganga upp til lengri tíma.

WOW air hefur borist ótal skilaboð frá reiðum netverjum, sem margir hverjir eru fastir á flugvöllum vegna aflýsingar á flugi þeirra.



Á þriðjudag tilkynnti WOW air að skuldabréfaeigendur félagsins hefðu samþykkt að breyta kröfum sínum í hlutafé. Kröfuhafar höfðu því í raun tekið félagið yfir og Skúli Mogensen, stofnandi WOW air, var því ekki lengur eini eigandi þess. Hann var hins vegar hluthafi eins og aðrir skuldabréfaeigendur og var áfram forstjóri fyrirtækisins.

Á sama tíma og tilkynnt var um að skuldabréfaeigendur hefðu samþykkt að breyta kröfum sínum í hlutafé var tilkynnt að flugfélagið leitaði að mögulegum fjárfestum til að koma inn með fimm milljarða króna svo hægt væri að tryggja áframhaldandi rekstur flugfélagsins. Nú er ljóst að það tókst ekki.

Strandaglópar víða

Breska fréttaveitan Press Association segir þúsundir Breta standaglópa. The Sun fer sérstaklega yfir það hvernig strandaglópar geta fengið bætur vegna miðakaupa fyrir flug sem ekkert verður af.



Reuters setur gjaldþrot WOW air í samhengi við það að fjöldi lággjaldaflugfélaga hafa orðið gjaldþrota að undanförnu. Meðal nýjustu dæmanna eru Flybmi og Primera Air. Þá segir á vef Reuters að Norwegian Air sé með rúmlega markaðshlutdeild meðal lággjaldaflugfélögum sem hafa ferja farþega yfir Atlantshafið og WOW air hafi verið um fjórðungs markaðshlutdeild í fyrra og flutt þrjár og hálfa milljón farþega.



Sky slær á svipaða strengi og bætir Monarch Airlines og Air Berlin við á lista gjaldþrota lággjaldaflugfélaga og segir hækkandi olíuverð og mikla samkeppni hafa gert félögunum erfitt fyrir.

Hér má sjá stutta sjónvarpsfrétt frá WKYC í Cleveland. WOW air hætti að fljúga beina leið til Cleveland í október en íbúar þar voru ósáttir við þá ákvörðun.

Í frétt AP fréttaveitunnar frá Bandaríkjunum, sem skrifuð er af íslenskum blaðamanni, er vitnað í bréf Skúla Mogensen til starfsmanna WOW air þar sem hann segist aldrei muna fyrirgefa sér. Þá er hröð stækkun WOW air nefnd og sú staðreynd að félaginu hafi ekkert gengið í að auka hagnað af hverjum farþega, þrátt fyrir aukin umsvif félagsins.

Erfið byrjunarstaða

VG í Noregi segir frá vendingum síðustu mánaða og að Icelandair hafi tvisvar sinnum reynt að koma að rekstri WOW air. Þá ræðir VG við sérfræðinginn Jørgen Elnæs, sem segir sömuleiðis að fjöldi lággjaldaflugfélaga hafi orðið gjaldþrota að undanförnu vegna hækkandi olíuverðs og aukinnar samkeppni.



Elnæs segir smærri aðila, með færri en tuttugu flugvélar, eiga mjög erfitt á markaðinum eins og hann er í dag. Þá sé sérstaklega erfitt að fá aukið fé til reksturs lággjaldaflugfélaga í dag. Hann segir enn fremur að byrjunarstaða WOW air hafi ekki verið góð. Félagið hafi ekki búið yfir nægu fjármagni, rekstrarkostnaður hafi verið hár og farmiðaverð of lágt. Það sé blanda sem gangi bara ekki til lengri tíma.

Elnæs bendir einnig á WOW air hafi leigt fjórar Airbus A330 sem séu töluvert dýrari í rekstri en aðrar flugvélar Airbus sem hægt er að fljúga styttri vegalengdir. Hann telur að hafi félagið ekki farið þá leið hefði verið mögulegt að bjarga því.

Þá segir hann einnig að gjaldþrot WOW air muni líklegast ekki hafa mikil áhrif á markaði í Evrópu né í Norður-Ameríku.

Financial Times ræddi við hinn 22 ára gamla Christian Ricci. Hann og níu fjölskyldumeðlimir hans voru strandaglópar í Frankfurt eftir að stöðvun rekstur WOW air var tilkynnt í morgun. Hann segir ömmu sína og afa hafa greitt gífurlegar fjárhæðir fyrir flugmiða svo helmingur hópsins kæmist aftur til Bandaríkjanna á meðan hinir væri að leita að ódýrari flugferðum.