Undankeppni EM: Lars og félagar hefja leik í Valencia

Átta leikir fara fram í undankeppni EM 2020 í dag.

Lars Lagerbäck og norska liðsins bíður verðugt verkefni í F-riðli. Norðmenn sækja Spánverja heim en leikurinn fer fram á Mestalla vellinum í Valencia.

Norðmenn hafa ekki komist á stórmót frá árinu 2000. Þeir hafa hins vegar sótt í sig veðrið undir stjórn Lars og gerðu t.a.m. góða hluti í Þjóðadeildinni.

Tveir aðrir leikir fara fram í F-riðli. Svíar taka á móti Rúmenum og Færeyjar sækja Möltu heim.

Sviss, sem fór illa með Ísland í Þjóðadeildinni, mætir Georgíu á útivelli í D-riðli. Í sama riðli mætast Gíbraltar og Írland. Þetta er fyrsti leikur Íra undir stjórn Micks McCarthy sem tók við liðinu af Martin O'Neill undir lok síðasta árs.

Ítalía, sem komst ekki á HM 2018, mætir Finnlandi í J-riðli. Ítalir tefla fram nokkuð ungu liði sem Roberto Mancini stýrir.

Tveir aðrir leikir fara fram í J-riðli í dag. Liechtenstein fær Grikkland í heimsókn og Bosnía og Armenía eigast við.

Leikir dagsins:

D-riðill:

14:00 Georgía - Sviss

17:00 Gíbraltar - Írland

F-riðill:

17:00 Svíþjóð - Rúmenía

17:00 Malta - Færeyjar

19:45 Spánn - Noregur

J-riðill:

19:45 Ítalía - Finnland

19:45 Liechtenstein - Grikkland

19:45 Bosnía - Armenía