Kjartan Henry virðist ósáttur og skýtur á Viðar Örn og landsliðsvalið

Kjartan Henry Finnbogason, framherji Vejle í dönsku úrvalsdeildinni í fótbolta, virðist vera nokkuð ósáttur við að fá ekki tækifæri með íslenska landsliðinu í næsta verkefni gegn Andorra og Frakklandi, sérstaklega í ljósi þess að mikil framherjakrísa er í hópnum. Ísland mætir Andorra á föstudagskvöldið í undankeppni EM allsstaðar 2020.

Aðeins voru valdir tveir framherjar í hópinn til að byrja með en það voru þer Alfreð Finnbogason, sem óvíst var að gæti verið með, og Björn Bergmann Sigurðarson. Alfreð er klár í slaginn en Björn Bergmann þurfti að fara heim í dag vegna meiðsla.

Viðar Örn Kjartansson, sem að hætti í landsliðinu í lok október á síðasta ári, var kallaður inn í hópinn en hann þakkaði fyrir sig með landsliðinu á Instagram-síðu sinni 20. október 2018. Landsliðsþjálfararnir viðurkenndu þó á dögunum að þeir voru búnir að heyra í honum hljóðið og halda dyrunum opnum fyrir framherjann.

Viðar er búinn að vera í basli undanfarna mánuði en hann datt út úr liðinu hjá Rostov í Rússlandi auk þess að glíma við meiðsli en hann hefur ekki spilað mótsleik síðan 5. desember og ekki skorað mark síðan 26. september í bikarleik á móti 3. deildarliði í Rússlandi.

Hann gekk í raðir Hammarby á lánssamningi í byrjun vikunnar til að fara að spila aftur reglulega en hann skoraði grimmt í Svíþjóð með Malmö fyrr á sínum ferli.

Þegar að fréttirnar bárust fyrst af Viðari Erni setti Kjartan Henry einfalda færslu á Twitter þar sem sjá má emoji-kall með rennilás fyrir munninn. Framherjinn greinilega ósáttur en vildi ekkert segja.

— Kjartan Henry (@kjahfin) March 19, 2019

Hann bætti svo um betur nú rétt áðan þegar að hann setti brot úr myndbandinu við lagið Sigta salta með Steinda Jr. en þar segir Steindi þau fleygu orð: „Ég er hættur við að hætta við að hætta við.“ Líklegast skot á Viðar Örn og ákvörðun landsliðsþjálfaranna.

pic.twitter.com/AXQ3Pj8kHA

— Kjartan Henry (@kjahfin) March 20, 2019

Viðar Örn á að baki 19 landsleiki og hefur skorað í þeim tvö mörk en þau komu bæði í vináttuleikjum á móti Sameinuðu arabísku furstadæmunum og Katar á útivelli. Almennt hefur landsliðsferilinn Viðars ekki verið góður og fór hann hvorki á EM 2016 né HM 2018.

Kjartan Henry hefur skorað sama fjölda marka í ellefu landsleikjum. Þau komu í vináttuleikjum gegn Kína og Tékklandi en hann þótti standa sig vel í þeim leikjum sem að hann spilaði.

Þá er Kjartan búinn að spila sex leiki á árinu 2019, þar af fimm í byrjunarliði og skoraði tvö mörk, síðast í lok febrúar. Hann spilaði síðast um helgina en komnir eru þrír og hálfur mánuður síðan að Viðar Örn spilaði mótsleik.