Eigandi Heimkaups steinhissa á vel heppnuðu aprílgabbi

Óhætt er að segja að aprílgabb vefverslunarinnar Heimkaups hafi heppnast afar vel í gær en íslenskir fjölmiðlar gerðu sér margir mat úr falskri fréttatilkynningu þess efnis að verslunarrisinn Target hefði keypt verslunina. Eigandi Heimkaups segist steinhissa á því hversu margir féllu fyrir gabbinu og hlupu apríl.

Fátt sem benti til annars en að satt reyndist

Í fréttatilkynningunni, sem send var út á vegum Heimkaups skömmu eftir hádegi í gær, sagði m.a. að „gríðarlegur uppgangur“ vefverslunarinnar hafi vakið athygli Target, sem hafi í kjölfarið ákveðið að festa kaup á öllu hlutafé Heimkaups. Þá hafi bæði nafni verslunarinnar og slóð inn á vef hennar verið breytt í Target.is.

Þegar inn á hina nýju vefsíðu var komið tók merki Target á móti notendum, og fátt sem benti til annars en að kaup verslunarrisans hafi gengið í gegn. Smelltu notendur hins vegar á hnapp til að kynna sér „allar nýju vörurnar“ voru þeir leiddir inn á síðu sem rækilega var merkt 1. apríl.

„Takk fyrir að hlaupa 1. apríl með okkur,“ sagði jafnframt í skilaboðum á vefnum og notendum boðið upp á afsláttarkóða, sem enn er hægt að nýta sér í versluninni. Þeir notendur sem gera sér ferð inn á Target.is í dag grípa þó í tómt, að undanskilinni 1. apríl-kveðju.

Íslenskir fjölmiðlar hlupu margir apríl og birtu fréttir á vefsíðum sínum um kaupin. Þar á meðal voru Ríkisútvarpið, Viðskiptablaðið, Stundin og DV. Fréttirnar voru þó í öllum tilvikum fjarlægðar af síðum miðlanna skömmu eftir að þær birtust.

Þá er ljóst að Guðmundi Magnasyni, eiganda Heimkaups, var mikið í mun að halda gríninu til streitu. Þegar Vísir náði tali af honum í gær sagðist hann spenntur fyrir kaupunum og sagði þau hafa átt sér tiltölulega stuttan aðdraganda, eða frá áramótum. Guðmundur fékkst þó ekki til þess að hafna því beinum orðum að um aprílgabb væri að ræða þegar hann var inntur eftir því og benti blaðamanni á að fikra sig áfram á vefnum til að komast að hinu sanna.

Heppnaðist betur en þau áttu von á

Guðmundur segir í samtali við Vísi í dag að aprílgabbið hafi heppnast afar vel og vakið mikla lukku.

„Ég reyndar verð að viðurkenna að ég varð steinhissa á því hversu margir fjölmiðlar hlupu, af því að grínið var svo grunnt,“ segir Guðmundur.

Þá hafi ekki verið lagt ýkja mikið í aprílgabbið, þó að það kunni að virðast íburðarmikið. Þannig hafi Heimkaup fengið lánað lénið Target.is, sem er í eigu Íslendings, en ekki fest kaup á því fyrir hrekkinn. Þá hafi hvorki verið notast við opinbert merki Target né rétta rauða litinn sem prýðir það.

„Við í rauninni gerðum ekki mjög mikið, þetta er gert á korteri. Og heppnaðist kannski betur en við áttum von á,“ segir Guðmundur.

En ertu nokkuð með samviskubit yfir því að hafa platað blaðamenn?

„Ég talaði við tvo fjölmiðla og ég hafði það ekki í mér að svara því beinum orðum [að um aprílgabb væri að ræða]. Ég gat talað í kringum það en svo kom beina spurningin og þá koxaði ég,“ segir Guðmundur.