Sjáðu hvernig VAR hafði áhrif á lykilatriði í sigri Tottenham á City

Myndbandadómgæsla (VAR) hefur verið að ryðja sér til rúms í stærstu keppnum heims og Meistaradeild Evrópu er engin undantekning. Hún hafði mikil áhrif á leik Tottenham og Manchester City í Meistaradeild Evrópu í gær.

Knattspyrnusamband Evrópu tók þá ákvörðun að notast við þessa tækni frá og með 16-liða úrslitunum á núverandi leiktíð í Meistaradeild Evrópu. Hún er þó komin til að vera og verður við lýði frá og með umspilsumferð Meistaradeildarinnar í lok ágúst.

Dómurum er heimilt að grípa til myndbandadómgæslu þegar atvik varða mörk, vítaspyrnudóma, bein rauð spjöld og þegar dæmt er á rangan leikmann.

Í leiknum í gær voru myndbandadómarar notaðir þegar vítaspyrna var dæmd á Danny Rose, varnarmann Tottenham, fyrir að handleika knöttinn innan teigs. Sergio Agüero lét þó hins vegar Hugo Lloris verja frá sér vítaspyrnuna.

Skoðun myndbandadómara þurfti einnig til að staðfesta að Son Heung-min missti ekki boltann út af vellinum áður en hann skoraði mark sitt á 78. mínútu. Svo var ekki og reyndist það sigurmark leiksins.

Bæði atvik má sjá efst í fréttinni.