Að minnsta kosti 290 látnir

Að minnsta kosti 290 manns fórust í átta sprengjuárásum í Srí Lanka á páskadag. Þetta staðfesta þarlend yfirvöld í dag en 24 hafa verið handteknir vegna hryðjuverkanna.  Árásirnar voru gerðar á kirkjur, hótel og fleiri byggingar í Srí Lanka en ekki er vitað hver ber ábyrgð á þeim.

Að minnsta kosti 500 eru slasaðir en 35 þeirra sem létust eru erlendir ríkisborgarar.

Um er að ræða mannskæðustu árás í Srí Lanka síðan borgarastyrjöldinni þar í landi lauk árið 2009.

Forsætisráðherra Srí Lanka, Ranil Wickremesinghe, sagði í gær að upplýsingar hefðu legið fyrir um mögulegar árásir en ekkert hefði verið aðhafst vegna þeirra. Útgöngubann var sett á í gær sem gildir til þriðjudags.

Fyrsta tilkynning um árásir barst um klukkan korter í níu að morgni að staðartíma í Srí Lanka í gær. Þrjár kirkjur í Negombo, Batticaloa og Kochchikade voru á meðal þeirra sem urðu fyrir barðinu á ódæðismönnum á páskadag. Sprengingar áttu sér einnig stað í Shangri-La, Kingsbury og Cinnamon Grand hótelunum í höfuðborg landsins. 

Allar sprengingarnar voru framkvæmdar af sjálfsvígsprengjuárásarmönnum. 

Lögreglan var kölluð út í framhaldi af því og gerði áhlaup á tvo staði þar sem sprengingar áttu sér stað í kjölfarið. Önnur þeirra var í Dehiwala, í suður Colombo, en hin nærri Dematagoda í Colombo þar sem þrír lögreglumenn fórust.  

Fréttastofa breska ríkisútvarpsins BBC segir ríkisstjórn Srí Lanka hafa beðið íbúa um að geta sér ekki til um hver var að verki og takmarkað aðgang að samfélagsmiðlum í skugga árásanna.

Engar upplýsingar hafa verið veittar um þá 24 sem eru í haldi. Fréttamaður BBC í Colombo í Srí Lanka, Azzam Ameen, segir þó að umræða sé þar í landi um að árásarmennirnir hafi tilheyrt herskáum hópi öfgaíslamista.