Suarez mun ekki fagna ef hann skorar á Anfield

Luis Suarez, framherji Barcelona, segir að hann muni ekki fagna á Anfield í kvöld muni hann skora gegn gömlu félögum sínum í Meistaradeildinni.

Barcelona vann fyrri leik liðanna 3-0 og eru í kjörstöðu fyrir síðari leikinn sem fer fram í kvöld. Suarez skoraði í fyrri leiknum og fagnaði af mikilli innlifun.

Það fór fyrir brjóstið á einhverjum stuðningsmönnum Liverpool og sparkspekingum en Suarez segir að markið hafi verið það mikilvægt.

„Fólk sem veit um hvað fótbolti snýst veit hversu þýðingamikið mark það er að skora í undanúrslitum Meistaradeildarinnar,“ sagði Suarez á blaðamannafundi í gær.

„Ég ber mikla virðingu fyrir stuðningsmönnum Liverpool. Útaf því ég skoraði og fagnaði með mínum stuðningsmönnum þá biðst ég afsökunar. Ég er mjög þakklátur fyrir Liverpool, stuðningsmennina og félagið.“

„Það er klárt að ef ég skora gegn Liverpool á Anfield þá mun ég ekki fagna. Ég gerði það ekki þegar ég skoraði í Hollandi, með Ajax gegn Gröningen,“ bætti Suarez við.