Sarri fundaði með Juventus en Chelsea ætlar ekki að reka hann

Juventus vill fá Maurizio Sarri til þess að taka við stjórn liðsins en Chelsea ætlar ekki að reka Ítalann. Þetta segir fréttastofa Sky Sports.

Samkvæmt heimildum Sky á Ítalíu fundaði Sarri með forráðamönnum Juventus í síðustu viku og var efni fundarins að Sarri tæki við starfi Massimiliano Allegri. Allegri yfirgefur Juventus í sumar eftir fimm ára veru í stjórasætinu.

Sarri er sagður vilja fara aftur til heimalandsins en Chelsea er ekki með neinar áætlanir um að reka knattspyrnustjórann.

Umboðsmaður Sarri mun funda með framkvæmdarstjóra Chelsea á fimmtudaginn, en síðasti leikur Chelsea á tímabilinu er úrslitaleikur Evrópudeildarinnar á miðvikudag.

Juventus vill ekki staðfesta neitt fyrr en eftir úrslitaleik Meistaradeildarinnar á laugardaginn ef svo færi að annað hvort Jurgen Klopp eða Mauricio Pochettino losni úr starfi.