Viðar skoraði og lagði upp í Íslendingaslag

Viðar Örn Kjartansson átti þátt í báðum mörkum Hammarby sem gerði 2-2 jafntefli við Norrköping í sænsku úrvalsdeildinni í fótbolta.

Selfyssingurinn kom heimamönnum í Hammarby yfir strax á annari mínútu og gerði hann þar fimmta mark sitt á tímabilinu fyrir Hammarby. Gestirnir svöruðu hins vegar með tveimur mörkum áður en fyrri hálfleikur var úti.

Á 72. mínútu lagði Viðar svo upp jöfnunarmark Hammarby fyrir Muamer Tankovic, leiknum lauk með 2-2 jafntefli.

Guðmundur Þórarinsson lék allan leikinn fyrir Norrköping.

Hammarby er í sjötta sæti deildarinnar eftir 11 leiki, Norrköping situr í því áttunda, fjórum stigum á eftir Hammarby.