Páll komst loksins á stefnumót í kvöld

Íslenskir þristavinir glöddust innilega þegar Páll Sveinsson lenti á Reykjavíkurflugvelli laust upp úr klukkan sjö í kvöld. Draumur þeirra, um að eini íslenski þristurinn kæmist til móts við bandaríska þristahópinn, hafði þar með ræst. Sýnt var frá vellinum í fréttum Stöðvar 2.

Á flugvellinum biðu hans fimm aðrir þristar, sem rétt eins og Páll, höfðu þjónað Bandamönnum í stríðsrekstrinum á árum síðari heimsstyrjaldarinnar.

Eldri menn úr fluggeiranum töldu að fara þyrfti jafnvel sex áratugi aftur í tímann til að finna dæmi um svo marga þrista samtímis á Reykjavíkurflugvelli. 

Flugvirkjar í sjálfboðavinnu fyrir Þristavinafélagið höfðu allt frá síðustu helgi unnið að viðgerð á öðrum hreyfli Páls á Akureyrarflugvelli. Olíuleki á erfiðum stað plagaði hreyfilinn og voru þristavinir að verða úrkula vonar um að verkinu lyki í tæka tíð.

Það var svo loksins á sjötta tímanum í kvöld, þegar hreyfilinn hafði gengið drjúga stund, sem grænt ljós var gefið á að vélinni yrði flogið suður, og flugmennirnir voru einnig í sjálfboðavinnu.

Á sama tíma höfðu amerísku þristarnir lent hver af öðrum í Reykjavík í leiðangri sínum yfir Atlantshafið. Þeim er öllum stefnt til Normandi í Frakklandi þann 6. júní þegar þess verður minnst að 75 ár verða liðin frá D-deginum 1944. 

Í annað sinn í vikunni var í skyndi boðað til flugsýningar með litlum fyrirvara. Svæði norðan Loftleiðahótelsins var girt af. Þar var fólki boðið að skoða þessar sögufrægu vélar í návígi, ræða við áhafnarmeðlimi og ganga um borð í sumar þeirra.

 

Það sýndi sig á þeim mannfjölda sem mætti, bæði núna og í fyrrakvöld, hver áhuginn er á leiðangri þristanna, sögu DC-3 og C-47-vélanna, sem og þessari ástsælu flugvélartegund. 

Auk Páls Sveinssonar bauðst gestum í kvöld að skoða flugvélar sem bera gælunöfnin Betsy’s Biscuit Bomber, Virginia Ann, Pan Am, Flabob Express og D-Day Doll.

Rétt eins og þristarnir í fyrsta hópnum, sem kom í byrjun vikunnar, eiga þessir það flestir sammerkt að eiga áhugaverða og jafnvel ævintýralega rekstrarsögu.

Áformað er að erlendu þristarnir haldi áfram för sinni til Bretlands á morgun. Búast má við fyrsta flugtaki fyrir klukkan átta á fyrramálið og að þeir verði allir farnir fyrir hádegi. 

Enn eru þrír þristar ókomnir af þeim fjórtán, sem fljúga frá Bandaríkjunum til Evrópu, og er búist við þeim á næstu dögum. 

Lendingar nokkurra þristanna í dag mátti sjá í fréttum Stöðvar 2: