Tuttugu og sex börn þurft að hætta frístundastarfi vegna vanskila foreldra

Frá febrúar 2017 til febrúar 2019 hafa alls tuttugu og sex börn misst plássið sitt á frístundaheimilum vegna vanskila foreldra sinna. Ekki liggja fyrir eldri upplýsingar en frá árinu 2017.

Þetta kemur fram í svari Helga Grímssonar, sviðsstjóra skóla- og frístundasviðs Reykjavíkurborgar við fyrirspurn Kolbrúnar Baldursdóttur, borgarfulltrúa Flokks fólksins.

Kolbrún segist hafa miklar áhyggjur af stöðunni. Ljóst er að í umræddum tuttugu og sex tilfellum hafa þau úrræði sem standa foreldrum í fjárhagsvanda til boða ekki dugað til þess að tryggja að börnin yrðu ekki af nauðsynlegri grunnþjónustu vegna erfiðrar fjárhagsstöðu foreldra sinna.

Þrjár leiðir eru í boði fyrir foreldra sem hafa ekki getað gert upp skuld sína til að afturkalla uppsögn á vistun barna þeirra en ef ekkert er aðhafst mun barnið aftur á móti þurfa að hætta frístundastarfi.

Ein leið er einfaldlega greiðsla vanskila, önnur leið er að semja um greiðslu vanskila og sú þriðja er þjónusta hjá þjónustumiðstöð sem verklagsreglur vegna vanskila foreldra varðandi þjónustu við börn bjóða upp á.

Í svarbréfi Helga kemur fram að flest barnanna hefðu þurft að hætta frístundastarfi vegna fjárhagsstöðu foreldra í febrúar og apríl á síðasta ári eða alls sjö börn í hvorum mánuði.

Helgi segir að langflestir foreldrar í fjárhagsvanda nýti sér þær leiðir sem í boði eru til að afturkalla uppsögn en hann segir jafnframt að mikilvægt sé að efla enn frekar samstarf skóla- og frístundasviðs og velferðarsviðs til að styðja foreldrana.